الحب كده… بقلم : داليا حجي
داليا خجي
ايوة و الله هو كده …يا ستنا يا عمنا الحب ده اللى كله أحاسيس و مشاعر ايوة اللى هو صادق ده فاكرينه؟
الحب هو اللى بيخللى لحياتنا طعم هو اللى بيهون علينا الويل اللى بنعيشه هو اللى بيخللى فى أمل فى بكرة.
كل اﻷديان السماوية قايمة على المودة و الرحمة الحب لا هو عيب و لا هو حرام.
فيه ناس طبعا عمالة تقرأ و تستغفر ربنا منهم اللى بيدعى لى بالهداية و منهم اللى بيدعى عليا و يقول جهنم و بئس النصير إيه اللى بتتكلم فيه ده؟ و ناس تانية بتتهمنى بالهيافة و بتقول خلاص خلصت كب مشاكلنا علشان نتكلم عن الحب و عن اﻹحتفال بيه.
لعلمك يا ستنا لعلمك يا سيدنا المقالة دى مكتوبة علشانكم أصل اللى عارف يعنى ايه حب ده مش محتاج كلامى ما هو عارفه و حاسه انما انتم مساكين أحوج الناس ليه قلبكم الجامد محتاج يلين عقلكم الحجر محتاج يتنور افتح كتابك السماوى و اقرا فيه حتلاقيه مليان حب مليان تسامح.
الحب و اﻹحتفال بيه مش حرام الحب بين أى اتنين فى الدنيا مش فسق الحب أسمى المعانى و أروعها.
أما بالنسبة للناس الكمل اللى فاهماه و عارفاه لكن بتتجاهله لنا هنا وقفة السيناريو بيبقى كاﻵتى:
طول ما احنا لسه على البر و لسه عايشين قصة حب أو مخطوبين الحال بيبقى عال العال الشاب المصرى بيبقى عايش فى دور الحبيب اللى كله مشاعر و فاكر عيد الحب المصرى و اﻷجنبى و مهتم أوى يحتفل بيه مع التأكيد بإنه حيبقى مختلف تماما بعد الجواز حيبقى فيه أجواء و ظروف أحسن بكتير كفاية يا حبيبتى اننا حنخرج و نرجع فى الوقت اللى يعجبنا و لا باباكى يقولك ترجعى امتى و لا اخواتك يدخلوا يقعدوا معاناو أخوكى الرذل اللى بيخرج معانا و طول القاعدة يقولنا بتقولوا ايه.
و طبعا القطة بتصدق كل ده و تسرح بخيالها فى اليوم اللى يتجوزوا علشان كل اﻷحلام دى تتحقق مش عارفة ان فيه نسبة واحد فى المليون بس اللى بيحققوا الكلام ده و الباقى بيتمنوا أيام الخطوبة ترجع و باباهم يملى شروطه عليهم أهو ساعتين أبرك من مفيش الحلم قلب كابوس.
المشهد بعد الجواز بيبقى له وجه آخر تعالوا نشوفه، بدأت الست المصرية من كام يوم تنعى حظها و بدأت تأقلم نفسها ان راجلها و لا حيعبرها بكرة و لا حتى بحزمة فجل و لا حيفتكر من أساسه اليوم ده و ردا على البوستات المتداولة و الستات اللى نازلة نقد فى الرجال .. الرجال كمان بدورهم شغالين استفزاز فيهم و بيقولوا فالنتين ايه اللى انتوا جايين تقولوا عليه.
هى بدورها غلبت معاه و صوتها اتنبح تقوله يوم 4 نوفمبر كل سنة و انت طيب يقولها ﻷ ده عيد الحب المصرى ده مش اﻷصلى أنا مش بعترف بيه. تستنى يوم 14 فبراير و تكرر المعايدة يقلب وطنى فجأة و يكلمها عن القومية العربية و تكتشف انها متجوزة احد فرسان هذا العصر اللى بينادوا بالتمسك بعروبتنا و مصريتنا غلبت يا حرام معاه و هو ودن من طين و ودن من عجين.
الفالنتين أو عيد الحب يوم بتترجاه كل ست مصرية من السنة للسنة علشان تسمع فيه كلمتين حلوين عندها استعداد تكتبهم لحضرة المحترم جوزها و يحفظهم و يسمعهم و الله الستات دول غلابة زى كمان ما فيه رجالة غلابة مش بنكر بس الستات الغلابة نسبتهم أكبر بكتير.
بما ان بكرة سوف يشهد العالم حدث جلل و هو اﻹحتفال بالفالنتين حقول شوية نصايح كده على الماشى للناس اللى حتحتفل:
حبتدى بالحبيبة/الخطيبة/الزوجة:
عزيزتى البنوتة الكيوت مش عايزين نكد و حياة والديكى لو نسى فكريه من غير بوز و تقل و غلاسة قوليله انتى هابى فالنتينز داى ده مش رمضان و لا العيد عادى يعنى ماتقلبيهاش غم الله يكرمك.
لو قالك مش حقدر أخرح الدنيا مش حتتهد و لا العالم حيوقف عادى شوفى يوم يناسبكم و أخرجوا و مش لازم خروجة فايف ستارز المهم المعنى
مش عايزاكى بأى حال من اﻷحوال طموحك ياخدك لبعيد و تجرى وراء أوهامك انه حايجيب لك هدية من داماس إذا فكر يجيب حيجيب حاجة تناسبه ماديا ما تستنكريش و تحكيله عن سوزى صاحبتك اللى خطيبها جابلها يخت و صورها فيه اصلا هى دى مقدرته و سوزى كدابة و مش مخطوبة من اﻷساس.. الفالنتين هداياه معروفة يا ورد يا شوكولا يا برفيوم و لو هو غنى حرب حايجبلك التلاتة. و تانى ماتخليش سقف طموحاتك عالى علشان الصدمة ل اللى زيك مش كويسة.
طلب شخصى علشانى او اعتبريه رجاء فى نفس ذات الوقت بلاش تلبسى أحمر اليوم ده و حياة ربنا اﻷحمر مش دلالة الفالنتين و لا له علاقة مش معنى انه عيد حب و ان العلامة بتاعة الحب القلب اﻷحمر تلبسى أحمر و كأنه نازل و واخد فى ايده طماطماية.
أخيرا بلاش تبقى ملزقة فى كلامك هو انتى بتحبيه اليوم ده بس اتعاملى عادى زى كل مرة بتقابليه بلاش تحسسيه انه خارج مع الفنانة ماجدة مصدرة السهوكة للست المصرية.
اﻷستاذ الفاضل الحبيب/الخطيب/الزوج:
شكر الله سعيك…معلش أصل باين على وش حضرتك القرف و كإنك بتعمل حاجة غير محتملة اضغط على أعصابك و تعالى على نفسك و افتكر اليوم اصحى الصبح اغسل و شك و اسنانك و قولها هابى فالنتينز داى سويتى آه سويتى عندك مانع؟ كلمتين حلوين مش حايحصل حاجة.
بالنسبة للخروج قادر تخرجها يا برنس و عندك وقت و فلوس يبقى كتر خيرك و ربنا يرزقك برزقها ان شاء الله بالنسبة للخروجة بلاش تفضل تتاوب و تقولها هلكان بس علشان ماتقلبيش خلقتك خرجت على فكرة كلمة خلقتك دى كفيلة تدمر علاقتكم لﻷبد أخرج و اتكلم فى كلام لطيف و خاللى دمك خفيف و حياة الغاليين ماتجيب سيرة الشغل و لا مشاكله و لا مامتها و لا مامتك مش وقته بكرة بكرة النكد مش حايطير موجود بالكوم مفيش اكتر منه.
اذا فكرتوا تخرجوا بلاش حديقة الحيوان و المصحف مفيش أى علاقة بين عيد الحب و جنينة الحيوان فهمنى ايه المغزى طيب من المكان ده و الله دى مهينة أوى صدقنى و لو على اﻷماكن الرخيصة فيه جناين و النيل و حاجات ببلاش مش بقولك خدها فورسيزونز نايل بلازا بس بلاش حديقة الحيوان.
نفس طلبى اللى طلبته منها بلاش أحمر ما تعومش على عومها… طيب هى هبلة انت يرضيك يقولوا عليك أهبل؟
خليك طبيعى بلاش سهوكة فى الكلام اتعامل عادى مش ناقصين تامر حسنى فى حياتنا نحنوح واحد كفاية علينا أصلك راجع لطبيعتك بعد كام ساعة فخليك طبيعى من اﻷول.
إذا اشتريت ورد مش لازم بقى جليتر تبهدل هدومك و هدومها و وشك طول القاعدة يبقى بيلمع و حاجة كده فضايح أوى و الورد مش بعدده انت مش داخل على بقرة ببرسيم كل ما يبقى كتير تشبع اكتر الورد بتنسيقه و شكله الحلو و حاول تفهم و تفتكر مرة واحدة فى حياتك هى بتحب ايه من انواع الورد هو مش واجب و بتأديه و السلام.. لو حاتجيب شوكولا كذلك مش 2 كيلو انت مش رايح تزور عيان فى المستشفى المهم يكون النوع اللى بتحبه و خلاص نيجى لﻷهم بلاش دبدوب بكررها بلاش دبدوب ايه الجميل فيه بكرشه و لونه اﻷحمر بيعبر عن ايه و ايه الرسالة اللى ممكن يوصلها بشكله ده و يا سلام لو بتدوس عليه يتكلم حاجة بجد مستفزة هو انت مكسل تقولها بحبك؟و هل مالقتش حد ينوب عنك غيره؟بتستأمنه مثلا و لا ايه مش فاهماك؟
لو فكرت تجيب برفيوم مش لازم برفيوم 100 مل و ريحتها أستغفر الله العظيم هى مش أفتر شيف هات حاجة ريحتها حلوة غير نفاذة غير خانقة و مش لازم براند حاجة لطيفة المضروب كتير بس تكون مش مقززة الناس فى المترو مش طايقين نفسهم بلاش تبقى سبب فى موت حد مالوش ذنب فى إختياراتك.
بلاش تقعد أسبوع تسألها ايه رأيك فى اليوم و الهدية حلوة الورد أخباره ايه معروف ان الورد يومين و حيموت هو مش ابنك نازل أسئلة عليه و لما تخرجوا ها حطيتى من البرفيوم؟ مش بالضرورة كل مرة و بلاش ذل الله يخليك.
و أخيرا كله على حسب امكانياتك و ظروفك هو مش فرض هو يوم بتنتهز الفرصة و تقول فيه كلمتين حلوين مش هيافة و مش حتقلل منك الحاجات دى خالص و لا هى حاجة لازم بس فرصة للتعبير عن مشاعرك حتى لو انت مغرقها مشاعر طول السنة و ده طبعا مستحيل اعمل اللى تقدر عليه اليوم ده.
بكررها تانى الحب مشاعر و أحاسيس نقية بين اتنين قادرين عليها عيشوها صرحوا لبعض بيها مش قادرين ابعدوا و نظام أنا راجعت نفسى و لقيت اننا مش نافعين مع بعض و لا أصلى اكتشفت انى اتسرعت ده نصب رسمى.
اتباع نظام فريد شوقى بتاع الله و أكبر و تنط من الشباك أسلوب رخيص رخيص ﻷبعد مدى. من اﻵخر تقدروا على الحب حبوا مش قادرين بلاش منه الحب صدق فى المشاعر و نية صافية خوف على حبيبك مش نصب عليه هو الحب كده.
