الوطن …. للشاعرة اعتماد عبده
الوطن مش حتة قماش متلونه
ده حاجات كتير مفرحه مع محزنه
منديل بقطن زرعوه الفلاحين
لجل ما يمسح عرقهم
وايدين تطبطب على المشتاق
لو يوم اوفى حبايبه فراقهم
وعيش طالع من فرنه حاميه بيترقص
وولاد بريئة فى شادر حزن بتهيص
وبطانيه ممكن تكون دايبه لكن برضه بتدفي
وحبة بلح من نخل شامخ
قليل بس بيكفي
الوطن ام قلقانه ساعة ميجي البوسطجي
وتلقى ايديه فاضيه من المراسيل
تحضن ولاد الجيران وتغزل
قلقها ساعة عصارى
غنوه مع مواويل
يا كل الى ماسك علم
من زمان من كام سنه
الوطن مش حتة قماش متلونه
ده حاجات كتير مفرحه مع محزنه
